blogak

Sustatu

Gure Eskuk burujabetasunaren aldeko Arantzazuko Adierazpen aurkeztu du

Gure Esku erakundeak agerpena egin du gaur Arantzazun (Gipuzkoa), 100 sinatzaileren izenpea daraman adierazpen batean burujabetasunaren aldeko aldarri bat egiteko. Euskal herritarrok "gure erakunde politikoak, gure estatus politikoa eta autogobernu maila, eta gure lurraldeen arteko harremanak zuzenean, mugarik gabe eta libre erabakitzeko eskubidea" dugula aldarrikatu dute. Jarraian, adierazpenaren testua eta ehun sinatzaileen zerrenda. 

Arantzazuko Adierazpena

Erabakian gara. Gure bizitzen jabe izan nahi dugu, gure bizitzak berreskuratu nahi ditugu; gure bizitzak eta gure etorkizuna, gure esku.

Aurrez-aurre ditugun erronkei eusteko unea da. Ez diogu krisi klimatikoari behar bezala erantzungo goi gailurrez gailur, neurri eraginkorrak hartzeari uko egiten badiogu. Ez diogu osasun krisiari behar bezala erantzungo, mundu mailako erantzun bat emateko gai ez bagara. Ez diogu krisi sistemikoari behar bezala erantzungo ez badugu sistema denon bizitzetara egokitzen. Bistan da erronka globalek mundu mailako neurriak eskatzen dituztela, baina sinestuta gaude tokian tokiko erantzunen eskutik etorri behar direla. Gertuko burujabetzatik, herri kohesioa bermatzen duen burujabetzatik jarduteko garaia da.

Krisien eta ziurgabetasunaren aurrean, batzuek jarrera autoritarioetan topatzen dute ziurtasuna, ustezko etsaiak baztertuz bilatzen dute babesa. Guk ez dugu norabide hori hartu nahi. Inork gure izenean agintzeak baino, gure bizitzen jabe izateak ematen digu guri ziurtasuna. Eta burujabe izatea aurrez-aurre ditugun eraldaketa eta erronkei eustea da, gertatzen zaigunaren gaineko erantzukizuna beste inoren eskuetan ez uztea: inplikatzea, konprometitzea eta erabakitzea. Gure herriak behin eta berriz egin du. Jostun eta artisau izan gara, zubigile eta kate-begi. Herri gisa, jakin dugu oztopoen aurrean erresilentziaz jokatzen, txarrenari onena ateratzen. 60ko hamarkadako loraldian bezala, tresna burujabeak sortuz, garai ilunenetan ere loratzeko gai izan gara.

Herri bat gara, eta herri gisa, gure etorkizun politikoa gure esku nahi dugu. Gehiengo zabal bat osatzen dugu, hamar euskal herritarretik zazpi gara, baina hamarretik hamarrentzako proposamena da gurea, erabakitzeak egiten gaituelako nor, eta elkarrekin erabakitzeak, herri.

Euskal herritar gehienok ez dugu indarrean dagoen marko juridiko-politikoa berresteko edo aldatzeko aukerarik izan. Guk ez dugu aukeratu hiru eremu administratibotan eta bi estatutan banatuta bizitzea. Ezin dugu halako erabakiak beste inoren eskuetan egotea onartu, guk geuk hartu behar ditugu, gure esku behar ditugu.

Herriari hitza emateko garaia da, edo beharbada, herritarrok hitza hartzekoa. Euskal herritarrok gure erakunde politikoak, gure estatus politikoa eta autogobernu maila, eta gure lurraldeen arteko harremanak zuzenean, mugarik gabe eta libre erabakitzeko eskubidea dugu. Munduko nazio guztiek bezala, gure etorkizuna autodeterminatzeko eskubidea dugu. Honenbestez, erabakitzeko tresnak behar ditugu herritarron eskura, besteak beste, erreferendumak.

Burujabetzarako bidean jauzi bat egitea gure esku dago. Gu guztion esku dago. Sinestu dezagun. Esku guztiak norabide berean jartzeko unea da; eragile, erakunde eta herritarrok elkarrekin egin behar dugu bidea, denok baitugu tokia bide honetan, eta norberak bakarrik bete baitezake berea.

Gure etorkizuna erabakitzeko prozesu bat lantzeko, adosteko eta sustatzeko beharra aldarrikatzen dugu. Gaur Arantzazun bildu garen herritarrok, norberak bere alorretik, gure alea jartzeko konpromisoa erakutsi nahi dugu, eta era berean, erronka honi eusteko dei egin nahi diogu gizarte osoari. Eragileei dei egiten diegu norabide honetan inplikatu daitezen; erakundeei, herritarron borondatea aintzat hartuz, erabakitzeko eskubidea instituzionalizatu eta lege bilakatzeko konpromisoa har dezaten; eta herritar guztiei dei egiten diegu herri gogoa errealitate bilakatzeko lan egin dezaten. Izan gaitezen berriz ere jostun eta artisau, zubigile eta kate-begi. Joka dezagun burujabe, inplikatuz eta konprometituz. Erabakian gara, bidean gaude.

Arantzazun, 2021eko abenduaren 18an
GURE ESKU

Sinatzaileak

Ainhoa Etxaide
Ainhoa Latatu
Ainhoa Olaso
Ainhoa Txurruka
Aitziber Garmendia
Aize Otaño
Alazne Beltran de Lubiano
Alizia Iribarren
Amaia Goirigolzarri
Amalur Alvarez
Amancay Gaztañaga
Amets Mtz de Heredia
Andoni Aizpuru
Ane Alava
Angel Oiarbide
Anna Garcia
Ariane Alberdi
Beñat Irasuegi
Eduardo Gaviña
Eguzki Urteaga
Eneritz Zabaleta
Estitxu Eizagirre
Estitxu Garai
Gaizka Aranguren
Garazi Castaño
Garazi Hach Embarek
Garbiñe Aranburu
Garbiñe Biurrun
Gemma Zabaleta
Gorka Espiau
Gotzone Sestorain
Haizpea Abrisketa
Helena Franco
Idurre Eskisabel
Imanol Esnaola
Iñaki Goirizelaia
Iñaki Gomez
Iñaki Soto
Iñigo Salaberria
Iñigo Urrutia
Iratxe Alvarez
Iratxe Esnaola
Isabel Elizalde
Izaskun Etxeberria
Izortze Santin
Jabi Azurmendi
Jexux Uzkudun
Jon Maya Sein
Jose Mari Agirretxe
Joseba Azkarraga
Joseba Tapia
Josu Etxaburu
Juan Jose Ibarretxe
Juan Kruz Lakasta
Juanjo Celorio
Jule Goikoetxea
Karmele Olabarrieta
Kike Amonarriz
Kike Zurutuza
Kiko Caballero
Koldo Tellitu
Koldo Zarate
Laura Mintegi
Libe Mimenza
Lorea Agirre
Maialen Arteaga
Maite Aristegi
Mario Zubiaga
Martxelo Otamendi
Menane Oxandabaratz
Mikel Irizar
Mirene Begiristain
Miriam Campos
Nagore Iturriotz
Naia Torrealdai
Naiara Goia
Nekane Alzelai
Nekane Artola
Nekane Balluerka
Nekane Berriotxoa
Olatz Salvador
Oroitz Jauregi
Patricia Velez
Paul Bilbao
Pello Urzelai
Pilar Kaltzada
Rafa Diez Usabiaga
Ramon Zallo
Sagrario Aleman
Samara Velte
Tarana Karim
Tasio Erkizia
Teresa Toda
Txutxi Ariznabarreta
Ugo Mayor
Unai Oñederra
Unai Pascual
Urko Aierbe
Xabier Oleaga
Ximun Fuch
Zelai Nikolas

Testu honen gaztelerazko eta frantsesezko bertsioak ere zabaldu ditu Gure Eskuk.

jatorrizkoa ikusi

2013-2024
Blogetan! Blog izarren bila

AZKUE FUNDAZIOA
Agoitz plaza 1, 48015 Bilbo, Bizkaia
Tel. 94 402 80 81 - Faxa. 94 405 24 07