Euskal selekzioa: Noraino eraman nahi du bakoitzak?

“Zein aterabide ikusten diozu euskal selekzioaren auziari?”, galdetu zion Euskal Herria Kirolak duela bi hilabete Athletic-eko futbolari Mikel Balentziagari. Eta hark erantzun: “Hasteko,  guk geuk, jokalariek, klubak, federazioak gauza gehiago egin ditzakegu. Uste dut bilera garrantzitsu bat egin beharko litzatekeela, gutxienez bakoitzak euskal selekzioa noraino eraman nahi dugun jakiteko”.

Noraino eraman nahi duen, eta horretarako zer egiteko prest dagoen, gehituko nuke, nire ezkortasun ia kronikotik. Gainerakoan, alferrik piztuko baitzaigu itxaropen argirik. “Ofizial izateari UEFAk eta FIFAk emandako ezezkoen aurka helegitea jartzeko aukera pasatzen utzi du, eta, horrenbestez, bukatu da euskal selekzioa ofizial bilakatzeko saialdi hau”, idatzi du Aitor Manterola Garate kazetariak Berrian: “Euskal selekzioaren ofizialtasunari ez diote soilik UEFAk eta FIFAk ezezkoa eman. Etxean bertan ere itxi zaio atea, edo atearen zirrikitua. Izan ere, Euskadiko Futbol Federazioak erabaki du bide hori bukatzea. Legeak beste pauso bat emateko aukera ematen badu ere, Javier Landeta buru duen zuzendaritzak aurrera ez jarraitzea erabaki du. Kirola Arbitratzeko Epaitegira joateko aukera zegoen, UEFAren eta FIFAren azkeneko ezezkoei helegitea jartzeko, baina epea pasatzen utzi du”.

Eta beheraxeago, honako hau: “Berriak jakin ahal izan duenez, gainera, federazioak ezkutatu egin dizkio Eusko Jaurlaritzako Kirol zuzendaritzari UEFAren eta FIFAren azkeneko ezezkoen agiriak”.

Eta ostean, hau: “David Salinas-Armendariz abokatuarekin (Eusko Jaurlaritzaren laguntzailea gai honetan) mintzatu da Berria, eta galderei erantzun aurretik garbi utzi nahi izan du bere hitzak bereak direla, ez Jaurlaritzarenak. Galdetu zaionean federazioaren jarreraren atzean zer dagoen, utzikeria hitza erabili du. Landetari eta haren kideei leporatu die Durangoko batzarrean onartu zena ez betetzea: ‘Egunen batean azaldu beharko du zergatik erabaki duen bide hau akabera arte ez eramatea’. (…) Bidea ekinez urratzen dela gaineratu du: ‘Groenlandiako eta Gibraltarreko federazioek etengabe eskatu zuten, eta, azkenean, onartu egin zituzten UEFAko eta FIFAko kide bezala. Garbi dagoena da bidean geratuz gero ez dela ezer lortzen'”.

2018an abiatutako saiakera bukatu da. Espero zitekeen, baina bataren eta besteren hitzek ezkortasuna handitu besterik ez dute egiten, nondik-nora eta nola jo argi ez dugulakoan.

“Baina ez gara estatu bat eta…”, “baina Espainiak ez digu utziko…”. Bai, hori dena badakigu. Halere: Auzi honetan guztian zer edo zer erabaki dezakezuenok, baduzue esaterik noraino heldu nahi duen bakoitzak?. Federazio, Jaurlaritza, klub, jokalari… Hartara, gainerakook agian jakingo genuke gure aletxoa nola jarri, etengabe purrustadaka aritu beharrean, haizeak nondik jotzen duen ere ez dakigula.

The post Euskal selekzioa: Noraino eraman nahi du bakoitzak? appeared first on Slump doktorearen zaintiratua.