Azaldu du hiru aldagai elkartu nahi izan dituela uneoro: lehen mailako jokalariekin deialdia egitea, ahalik eta publiko gehien har dezakeen futbol zelaia lortzea eta norgehiagoka erakargarria bilakatuko lukeen aurkari garrantzitsua gonbidatzea. “Baina ezinezkoa izan zaigu. Prozesu horretan guztian, funtsezkoa izan da Ligak proposatutako ordutegi-aldaketa. Ezin izan dugu gure ametsa errealitate bihurtu”, adierazi du Landetak. “Ezin hobeto ulertzen dugu horrek guztiak eragin dezakeen frustrazioa, eta, jakina, partekatu egiten dugu. Ez zen gura genuena eta onartzea gogorra izan da. Hemendik aurrera, hiru aldagai horiek martxoan ematea da gure helburu nagusia. Lanean gogor jarraituko dugu, gure helburua Euskal Selekzioa jokalari onenekin ikustea delako, zelairik onenean eta aurkaririk onenaren aurka”. Frustrazioa.

Eta mesedez, ez nazazue ni sartu “honen guztiaren errua Realak du jokalariek atseden hartu nahi dutelako” vs “proposatutako datari uko egiten lehenbizikoa Athletic izan zen” eztabaida antzuan, frustrazioa areagotu besterik egiten ez didazuelako. Twitter ostia hori!

Eta badakit ez duela lotura zuzena, edo bai, ez dakit, baina Gabonetako futbol partidarena etorri da mendi korrilakarien erabakiaren biharamunean. Jakingo duzue ziurrenik zer gertatu den: Korrikalariek ez dute korrituko berriz euskal selekzioarekin. Mikel O. Iribar Berriako kazetariak jaso zuen albistea: “Korrikalariek ‘onartezintzat’ jo dituzte Euskal Mendizale Federazioko zuzendaritzak hartutako erabakiak”. Eta beheraxeago: “Duela 20 urte sortu zuten mendi korrikalariek Euskal selekzioa, Euskal Mendi Federazioaren eskutik. Euskal korrikalariak mundu osoan ibiltzea du xede, eta ofizialtasunaren aldarria egin du, ‘eta horretan aritu gara’, gehitu dute oharrean. ‘Boluntario’ lanean aritzen diren hautatzaileek aukeratzen dituzte korrikalariak. 2021eko otsailean, hauteskundeak egin ziren Euskal Mendi Federazioan, eta zuzendaritza berria eratu. Oharrak dioenaren arabera, korrikalariek ez zuten sumatu aldaketa handirik, hautatzaileek egiten baitute zuzendaritzaren eta korrikalarien arteko zubi lana. ‘Baina hautatzaileek aitortu ziguten kezkatuta zeudela, zuzendaritza berriak lan egiteko beste modu bat zuelako’, diote oharrean. Adierazi dutenez, zuzendaritzak ‘mespretxuz’ eta ‘aldebakartasunez’ hartutako erabakien ondorioz, hautatzaileetako batek kargua utzi zuen, eta beste batek ez zuela jarraituko esan zieten.

Zer gertatu den jakiteko, Albert Jorquerak Runedia (El Mundo Deportivo) agerkarian idatzitako artikulua irakurri dezakezue. Hainbat mendi korrikalariren hitzak jaso ditu, haien haserrea ulertzen laguntzen dutenak. Latzak dira kontatzen dituztenak.

Eta hor badira, bigarren edo hirugarren maila batean, euskal selekzioaren ofizialtasunaz hitz egitera eraman gaitzaketen kontuak. Askok diozue sakon hausnartu behar dela gaiaren bueltan, eta gizartea mobilizatzen bada azkenean gauzak lortuko direla. Baliteke, baina bulego honetan edota bestean helburua zein den argi ez badago edo badagoen arren zein den argi esaten ez bada…

Tira, barkatuko didazue nire ezkortasun ez konstruktibo honengatik, baina…