blogak

Slump doktorearen zaintiratua

Aisia 

Emakumezkoen futbol liga bertan behera: Txapelketa profesionala ez izatearen ajeak

Alemaniako emakumezkoen futbol liga maiatzaren 29an berrabiatuko den bitartean, beste herrialde batzuetako txapelketak bertan behera geratu dira, Espainiako Estatukoa kasu, gizonezkoen liga ez bezala.

Ainhoa Tirapu: “Ziurtzat ematen nuen ez ginela itzuliko. Guk ez dugu hainbeste diru mugitzen eta ez dauzkagu osasun-protokoloak betetzeko baliabideak” / Argazkia: @AthleticClub

“Pozik nago denboraldia berrabiatzeko hartutako erabakiarekin, krisi garai honetan hori da behar genuena”, adierazi du Alemaniako Futbol Federazioko presidente Fritz Kellerrek: “Txapelketa itzultzea pauso inportantea da normaltasunerantz, bai futbolean baita gizartean ere. Bundesliga aitzindari da emakumezkoen nazioarteko futbolean”.

“Denboraldiarekin jarraitzea seinale oso ona da emakumezko futbolarentzat, eta agerian jartzen du kirolari profesionalek jasotzen duten berdintasunezko tratua”, gehitu du Hannelore Ratzeburg presidente ordeak.

Profesionaltasuna. Hori da, hain justu, beste herrialde batzuekiko dagoen desberditansuna ulertzeko gakoetako bat. Espainiako Estatuan, esaterako, lehiaketa profesional bakarrak gizonezkoen lehen eta bigarren mailako futbol ligak eta ACB saskibaloi liga dira. Kirol txapelketak berrabiatu ahal izateko baldintzetako bat hori denez gero, emakumezkoen ligak bertan behera geratu dira. “Ez du axola protagonistek gizonezkoek haina denbora eskaintzen badiote jarduera horri”, idatzi du Ricardo Uribarrik CTXT hedabidean. “Neskek profesionalen moduan lan egiten dute, baina haien txapelketak ez dira juridikoki horrela hartuak”.

Hori horrela, ACFF patronalean bildurik dauden Estatuko emakumezkoen futbol taldeek Gobernuari –zehazki Kirolaren Batzordeari (CSD)– eskatu diote lehen mailako ligari izaera profesionala emateko. ACFF elkartean lehen mailako hamahiru talde daude, guztiak Athletic, Bartzelona eta Real Madril salbu. Hamasei talde horietatik hamabi entitate profesionalen parte dira, aipatu hiruak eta Reala adibidez, gizonezkoen Ligan ari direnez.

Futbol Federazioak erabaki du Ligako garaile gisa Bartzelona jotzea. Txapelketa amaitzeko zortzi jardunaldi falta ziren / Argazkia: fcbarcelona.es

Patronalaren hitzetan emakumezkoen lehen mailako futbol ligak profesionala izateko baldintzak betetzen ditu, klubek lan-harremana dutelako haien jokalari eta langileekin, eta elkarteak denboraldi bakoitzean hiru milioi euro jasotzen dituelako ikus-entzunezko eskubideengatik (Mediapro enpresarekin du akordioa). Liga profesionala balitz, jokalariak deseskaladaren 1. fasean hasiko ziren entrenatzen, Palco123 hedabideak nabarmendu bezala. Gainera, ikus-entzunezko eskubideak haien esku geratuko lirateke, Federazioarekin koordinazio-hitzarmena sinatu beharko luketen arren, gizonezkoen futbolarekin gertatzen den moduan.

Izan ere, Federazioak dauka gaur gaurkoz berak antolatzen dituen txapelketen eskubideekin komertzializatzeko ahalmena, emakumezkoen lehen maila barne, nahiz eta klub gehienek –hamabik– Mediaprorekin akordioa sinaturik duten datozen bi denboraldietarako. Federazioak datorren denboraldian erabakiko balu ikus-entzunezko eskubideak berak ustiatzea, Mediaprorekin akordioa lotu beharko luke, telebisten gatazka berpizterik nahi ez badu. Mediapro eta Federazioaren arteko gatazka medio, aurten jokatutako hainbat partida garrantzitsu ez dituzte emititu.

Horren harira, gogoratu behar da emakumezko futbolariek lehen hitzarmen kolektiboa sinatu baldin badute, hein handi batean izan dela Mediapro ekoiztetxeak jarri duen diru kopuruari esker.

Ainhoa Tirapu: “Ziurtzat ematen nuen ez ginela itzuliko”

“[Gizonezkoen eta gure] errealitateak desberdinak dira, guk ez dugu hainbeste diru mugitzen eta ez dauzkagu osasun-protokoloak betetzeko baliabideak”, zioen Ainhoa Tirapu Athletic-eko futbolari jada ohiak, El País egunkariak hilaren 9an plazaratutako elkarrizketan. “Zein klubek dauka bere jokalariak x denboraz bakartzeko aukerarik? Kontuan hartu urtebete baino gehiago –eta greba bat tarteko– kosta zaigula 16.000 euroko soldata lortzea… Batzuek ez dute itzuli ahal izateko azpiegiturarik. Ziurtzat ematen nuen ez ginela itzuliko”.

Krisi honetatik emakumezkoen futbola nola aterako den galdetuta, Tirapuk dio bera gehien kezkatzen duena dela berriro publikoarekin noiz jokatuko ote den, eta “ikusleak zenbateraino beldur izango diren jende asko biltzen den lekuetara joateko”. Normaltasunera bueltatzen goazen neurrian jendeak disfrutatzeko gogoa izatea espero duela dio. “Agian, hain garestia ez denez, emakumezkoen futbola lehenago atera liteke”.

jatorrizkoa ikusi

2013-2024
Blogetan! Blog izarren bila

AZKUE FUNDAZIOA
Agoitz plaza 1, 48015 Bilbo, Bizkaia
Tel. 94 402 80 81 - Faxa. 94 405 24 07