blogak

Opio errebeldea

Bizi poza

Brasil izan daiteke munduko lekurik beroena, non dantza, kapoeira eta eguzkia elkarrekin jolastera ohituta daude. Fabela, plaza, hondartza edota makro hirien zirrikituetan ondo pasatzeko grina sorleku bihurtu daiteke edozein momentutan. Futbolean ere nabari izan da sarritan, bizitzaz inhhauteri bat egiteko gogo horiek, ez da kasualitatea Ronaldinhoren irrifarrea, Denilsonen bizikletak, Romarioren driblina, Juninhoren magia. Partiduetara ondo pasatzera joaten zirela zirudien, irabasteko presio alde batera utziz.

Azkenengo urteetan, energia positibo horren ordezkari nagusietako bat, Associação Chapecoense de Futebol izan da. 1973an jaiotako talde gazteak, maldan gora dantzatzen ikasi izan du betidanik, ez bait dute bide erreza aurkitu. Horren adibide nagusi 2003. urtean pairatutako krisia izan zen, zorrak eta egoerari irtenbide bat bilatzeko beharrak itota, Klubeko izena aldatu behar izan zuten urtebetez, 2004.gaurko Chapecoense bueltatu zen arte.
Zenbait denboraldi geroago, 2009an “Chape” desagertzeko zorian zegoelarik , imaginazio eta barne kudeaketa eredugarri baten ostean, ekonomia sendotu eta Brasileirao de la serie Dtik Cra igo zen (mirariaren hasiera).
Haskunde horren bidetik,2012an Serie Bra igo, eta hurrengo urtean seria A mailara jokatzeko eskubidea ere lortu zuten. Hau bai Tourmaleta!

Aurten Copa Sudamericanako finala Atletico Nacionalen kontra jokatzeko eskubidea lortu zuten. 5 urtetan, 4° mailatik kontinenteko hoberenak izatera! Miraria? Ez dut uste, resilientzia, lana, pasioa eta elkarkidetzaren emaitzarik garbiena da.
Baina poztasun hori, minak eztali zuen pasa den azaroaren 29an, Chapecó hiriko taldea Kolonbiara zeraman hegazkina erori zenean.

Ez dira gutxi izan futbolaren mundutik jaso dituzten doluminak eta omenaldiak, izan ere, River Plate orlegiz jokatu zuen atzo, San Lorenzo talde Brasildarraren kamisetarekin irten zen berdegunera, talde askok Chapecoren harmarria altzoan eraman dute, bideoak, minutuetako isilune amaituezinak… FORZA CHAPE!

Gure omenaldi txikitxoa egiteko, Asier Ormazabal futbolari Santutxuarra gonbidatu dugu gurera, Filipe Machado Chapecoenseko erdilaria ezagutu baitzuen Pontevedran elkarrekin jokatu zutenean:

Filipe baino hilabete batzuk lehenago heldu nintzen ni Pontevedra aldera, Lezamako berotasunetik irten eta neure burua “helduen” futbolean neurtzeko asmoz.

Yuri, Charles, Thiago eta Igor brasildarrak, argentinar bi, Nasser argeliarra, Cabo Verdetik heldutako Tinaia, Organista portugaldarra, Baptiste eta Bonnis frantziarrak… Aldagela berean kultura, hizkuntza, izaera eta erlijio desberdinak.

Denbora gutxira Buenos Airesen jaiotako Victor iritsi zen, Maccaby Haifatik; Mikel Saizar tolosarra, Errealetik, eta baita beste hiru brasildar ere. Haien artean zegoen Filipe Machado, Porto Alegretik irten ondoren.

Basildarren estereotipoa neurrira betetzen zuen hoietarikoa zen Filipe. Tipo alaia zen, eta edozein momentutan txantxak egiteko prest zegoen. Musika topera jarri, eta, eskura zuen edozer hartuta, erritmoa neurrira jarraitzen zuen beti.
Galiziara iritsi berritan ez nuen ulertzen nola izan zitekeen posible partida galdu eta, hala ere, ziria sartzen aritzeko gogoak izatea. Edo partida garrantzitsu baten aurretik, beroketa-lanetan, ondokoari adarra jotzen ibiltzea. Ulertezina zen niretzat.

Garai horretan ideia bakarra nuen buruan: entrenamenduak eta lana zenbat eta arduratsuago hartu, orduan eta hobeagoak izango ziren fruituak.

Baina Filipek profesionala izateko beste era batzuk ere badaudela erakutsi eta irakatsi zigun: posible zen, aldi berean, umorez aritu eta gogotsu lan egin, emaitza ezinhobeak eskuratze aldera. Berak horrela ulertzen zituen futbola eta bizitza, eta horrela bizi zituen, 24 orduz.

IMG-20161213-WA0008Talde berri batera heldutakoan, erronka handienetakoa da kideen errespetua irabaztea, eta berak, errespetuaz gain, denon begirunea ere lortu zuen.

Goian bego Filipe.

Esperantza, poztasuna eta borrokak markatu izan du talde berdearen bizitza, beraz, ziur nago Klubak aurrera egingo duela, eta Samba doinuak, tamborraren botereakin batera laster bueltatuko direla Arena Condá Estadiumera. Chapecoenseren mitoa gero eta handiagoa egiten ari da, nahiz eta une gogorrak izan, aro berriaren lehengo harriak jarritak daude jada, omendu ditzagun Filipe ta lagunen eredua jarraituz, bizi gaitezen bere lau zutabekin: indarra, kemena, ausardia eta bizi poza.

jatorrizkoa ikusi

2013-2024
Blogetan! Blog izarren bila

AZKUE FUNDAZIOA
Agoitz plaza 1, 48015 Bilbo, Bizkaia
Tel. 94 402 80 81 - Faxa. 94 405 24 07