Eskolan haurrei ateratzen zaizkien argazkiez hiru gogoeta

Urte eta erdiko umea ikaskideengandik baztertu dute eta besteek plastilinarekin nola jolasten duten begira utzi dute, irakasleek eszena bideoan grabatu nahi dutelako eta ume horren gurasoek ez dutelako baimenik eman umeari argazkiak atera edo bideoan grabatzeko. Zein momentutan jarri dugu irudia eskolako dinamikaren aurretik?

Bat. Aipatu berri dugun pasartea irakasle batek kontatu du sare sozialetan, eta erantzunei erreparatuz gero, ez da kasu isolatua; ama batek, adibidez, azaldu du semea Errege Magoen paje izan gabe geratu zela argazkietan ateratzeko baimenik ez zuelako, eta gurasoekin haserretu zela mutikoa. Kontua da gelako dinamika puskatu gabe, eta batez ere dinamika horretatik inor baztertu gabe, irudiak ateratzeko moduak badirela: aurpegian emotikonoa jarrita, pixelatuta, ume hori bizkarrez hartuta, haurra ageri ez den zatian zentratuta… Guraso askok gustuko dugu eskolatik gure seme-alaben argazkiak jasotzea, zeinen ondo moldatzen diren eta zein gauza interesgarriak egiten dituzten ikustea, eta eskertzen dugu nahikoa lanpetuta ibili ohi diren hezitzaileek tartea hartzea irudiren bat edo beste ateratzeko, baina batak ez dezala bestea baldintzatu, argazkiaren gainetik dinamika bera eta parte hartzeko denen aukera errespetatzea baita lehentasun.

Bi. Hainbatetan, ez da bereizten ikasleei ateratako irudiak familiei bidaltzeko bakarrik diren ala edozein erabilerarako (publikoki sare sozialetan zabaltzeko, esaterako), eta badira gurasoak pozez jasotzen dituztenak beren txikien eskolako argazkiak, baina argazki horiek beste plataforma batzuetan hedatzerik nahi ez dutenak. Familiek bete beharreko inprimakiak zenbat eta aukera gehiago eman zehazteko irudien zein erabilera baimentzen dituzten eta zeintzuk ez, orduan eta buruhauste gutxiago.

Eta hiru. Gure irudiak mundu digitalean zabaltzeak dituen inpaktu eta ondorioez, gure irudiaren gaineko kontrol eta kontzientziaren garrantziaz nerabeak hezten gabiltzan garaiotan, gogoetatzen al dugu guk –eskolako nahiz etxeko helduok– adin txikikoei ateratzen diegun argazkien erabileraren inguruan? Familiei bidaltzeko irudiak al dira? Ekintza, momentu eta proiektu bereziak baino ez ditugu partekatzen plataformetan ala etengabe gabiltza sare sozialetara gure ikasleen irudiak igotzen? Zein mezu ematen diegu eta eman nahi diegu, argazkiz eta bideoz saturatuta dauden (gauden) garaiotan?

The post Eskolan haurrei ateratzen zaizkien argazkiez hiru gogoeta appeared first on Jendartean.