blogak

Hitzartzen

AHOBIZI IZAN NAHI DUT (edo BELARRIPREST HOBE?)

Euskaraldia dagoeneko bere arrastoa uzten ari dela konturatzeko balio izan didate azken hilabeteetako kilometroek. Linguistikoki zer garen eta nor izan nahi dugun erabaki beharra bada, bere horretan, garaipen handia.

Izan nahi dugun hori izateko formazioa eskatzea, erronkak aurreikusteko tartea hartzea eta konponbidearen jakin-mina piztea da seinalea; ahalduntzeko irrika eta urrats bat aurrera egiteko intentzioa taldean lantzea proba ezin garbiagoa.

Beldurra? Hartutako konpromisoa ez betetzearena, dela nekeagatik dela korapiloa askatzeko baliabiderik ez izateagatik.

Ilusioa? Herriko musika aldatzekoa, euskara gehiago entzutekoa, izan nahi duguna izateko testuingurua erraztekoa.

Nire aurreikuspena? Sintonia onean belarriprestek zein ahobiziek euskara dezente gehiago egingo dutela eta beren burua zaintzeko belarriprest diren batzuk ahobizi jokabidea izango dutela hamaika egun horietan.

Eta hilabete honetan, izena ematerako orduan, zailena: erabakia hartzea. Zer izango gara, ahobizi ala belarriprest? Tailerretan makina bat aldiz azaldu behar izaten dugu ez dela euskara mailaren baitakoa, eta hala erakutsi digute parte hartzaileek.

Ahobizia: euskaraz bizi nahi duena eta, besteek ulertzen dioten bitartean, euskarari eusteko indarra eta gogoa duena.

Belarriprest: bere testuingurua euskarara etor dadin nahi duena edo aldatzen uzteko borondatea aitortzen duena.

Hamaika egun izango dira, testuingurua aldatuko zaigu eta aldaketa guztiek dakarten nekea ekarriko digu honek ere. Adi egotea izango da gure lana, lagunei erdara beharrean euskara konpartituko dugula adieraziko diegu batzuk eta erdara jasotzen genuenok euskara etorriko zaigula onartu beharko dugu; nahi gabe ateratzen zaiguna nahita egingo dugu. Ahalegin partekatua, beraz.

Balia ditzagun lagunarteko elkarrizketak, herrietako gune antolatuak, ondoko euskaltzaleak biziko ditugun egoerak irudikatzeko, gure indarra neurtzeko, izango dugun laguntza usaintzeko eta gure neurriko rola zein den erabakitzeko.

Eta, Euskaraldian, ikas dezagun emozionalki aske izaten, lotsarik eta nekerik gabe, nahi duguna egiten.

jatorrizkoa ikusi

2013-2019
Blogetan! Blog izarren bila

AZKUE FUNDAZIOA
Agoitz plaza 1, 48015 Bilbo, Bizkaia
Tel. 94 402 80 81 - Faxa. 94 405 24 07