blogak

Filipinetatik

“Euskal Herrian jaio ez garen euskaldunak ere euskaldunak gara”

Alejo Conti (Rosario, 1992) Nazioarteko Harremanetako ikaslea eta euskara irakaslea da Rosarioko Unibertsitate Nazionalean. Horrez gain, Zazpirak Bat euskal etxeko kidea ere bada.

Alejo Conti (eskuinean) bere ikasleekin Zazpiak Bat euskal etxean (Rosario, Argentina).

Euskal munduan murgildu baino lehenago zer zenekien Euskal Herriari buruz?

Espainiako gobernuak diruz lagundutako ‘Parque España’ eskolan ikasi nuen. Han irudi ofiziala erakutsi ziguten bakarrik. Kontua da, eskolak Malagara antolatutako ikasketa bidai batean hiru bilbotar ezagutu nituela. Haiek erakutsi zidaten Euskal Herriaren beste irudia zein den.

Zerk piztu zuen zure interesa?

Hasiera batean musikak erakarri ninduen. Berri Txarrak eta Exkixu bezalako taldeei esker entzun nuen lehendabiziko aldiz euskara. Hizkuntza polita iruditu zitzaidan baina letrek zer zioten ezin nuen igarri ere egin. Horregatik, Zazpirak Bat euskal etxera hurbildu nintzen euskara ikasteko asmoz. Han Gaztedi Zutik dantza taldeko neska-mutilak ezagutu nituen eta haiekin, 2008an La Platan ospatu zen Argentinako Euskal Astera joan nintzen. Orduan maitemindu nintzen erabat euskal kulturarekin.

Urte horretan bertan, Euskara Munduan programan hasi nintzen euskara ikasten. 2012an amaitu nuen prestakuntza eta segituan Gaztemundurekin Euskal Herria ezagutu nuen.

Euskal Herrira joan zinen lehen aldi hartan zerk harritu zintuen?

Gauzak ez direla Argentinan entzuten ditugun bezala. Argentinan Euskal Herria terrorismoarekin eta arazo politikoekin lotu ohi dugu.

Zer da zuretzat beraz Euskal Herria?

Ez da erreza esatea. Niretzat Euskal Herria lur zati bat baino gehiago da: ideia multzo bat, bizitzeko, ikusteko eta baloreak segitzeko modu bat. Horregatik, Euskal Herrian jaio ez garen euskaldunak ere euskaldunak gara.

Aurten Rosarioko Unibertsitate Nazionalean euskara klaseak ematen dituzuen lehendabiziko urtea da. Zenbat lagunetako taldea osatzea lortu duzue?

Hamar ikasle inguru etortzen dira astean bitan.

Eta zerk bultzatzen ditu zure ikasleak euskara ikastera?

Gehientsuenek euskal jatorriak dituzte. Batzuek, esate baterako, aiton-amonek erabiltzen zuten hitzaren bat edo abestiren bat gogoratzen dute. Beste batzuek, Euskal Herrian senideak edota lagunak dituztelako hasten dira euskara ikasten.

Argentinan euskara ikasi nahi dutenek zein baliabide dituzte eskuragarri?

Zorionez ia euskal etxe guztietan dago euskara irakasle bat. Gainera, material eta liburu ugari izaten ditugu eta bestela ere hor dago beti Internet. Sareak gauzak nabarmen erraztu dizkigu, pentsa Euskara Munduan programa hasi zenean euskara klaseak Euskal Herritik bidalitako kaseteekin prestatu behar izaten zituztela.

Alejo Conti, Rosarioko Unibertsitate Nazionaleko euskara irakaslea.

Ikasitako euskara praktikatzea erraza al da?

Ez, ezta gutxiagorik ere. Zaila da eta harreman gutxi dugu euskaldunekin. Askotan, euskaraz mintzatzeko beste euskal etxeko batzuekin hitz egin behar izaten dugu Skype bidez. Hori Euskara Munduan programan murgilduak gaudenean erreza da baina behin amaitutakoan, klase kideekin harremana mantentzea zaila izaten da. Hemen Rosarion adibidez, nire euskara mailan mintzo direnak bi edo hiru izango dira.

 Zein da Argentinan euskara irakasten zabiltzatenon asmoa?

Euskara ikastera eta euskal kultura ezagutzera hurbiltzen den edozein argentinarrarentzat euskara irakasle bat prest izatea. Hori da gure helburu nagusia.

Eta zertarako balio du Hego Amerikan euskara ikastea?

Oso garrantzitsua da, euskara bizirik dagoen hizkuntza bat dela erakusten dugulako.

Elkarrizketa hau egiten ari garen Zazpirak Bat euskal etxearen aurrean, kalea gurutzatuta, Rosarioko Nafar Etxea (“Centro Navarro de Rosario”) dago. Nolako harremana duzue beraiekin?

Ez dugu inolako harremanik. Kultura berdina egiten dugu biok baina politikak banatzen gaitu.

Posiblea al da Rosarioko Nafar Etxean euskara ikastea?

Ez. Ez dituzte euskara klaseak. Euskara ikasi nahi duten Nafar Etxeko kide bat baino gehiago gure euskal etxera etorri behar izan dute.

Euskal Herria gora eta behera, baina ez dituzu euskal jatorriak, ez al da hala?

Ez, hala da. Nire arbasoak italiarrak eta aragoiarrak dira.

Zer duzue argentinarrok euskaldunetatik ikasteko?

Argentinarren nortasuna oraindik sortze bidean dago. Zentzu horretan, euskaldunek beren aberria, lurra edo herria nola maitatzen duten positiboa iruditzen zait. Hizkuntza eta tradizioak (berriak eta zaharrak) mantentzeko egiten dituzten ahaleginak. Euskaldunek denarekiko duten lotura apartekoa da. Argentinarrok tamalez ez ditugu oraindik lotura hain sendoak.

Eta alderantziz, zer dugu euskaldunok argentinarretatik ikasteko?

Malgutasuna. Euskaldunak ez dira malguak, gauzak beti haiek nahi duten moduan egin behar izaten dira.

Datorren abuztuan Euskal Herrira zoazte lagun talde bat, zertara zoazte?

Euskal Herriko uda ezagutzera. Gehienek ez dute hangoa ezagutzen eta udaran jai eta ekintza asko egoten direnez, Euskal Herria ezagutzeko aukera zoragarria da.

Amaitzeko, zein mezu helaraziko zenieke Euskal Herrian bizi diren euskaldunei?

Hona etortzera animatzen ditut. Jakin dezatela Euskal Herritik 10.000 kilometrora badirela euskal kulturarekin konpromisoa duten lagunak. Azken batean, zer egiten dugun eta zer egiten ez dugun ezagutu eta ikusi beharko lukete.

jatorrizkoa ikusi

2013-2019
Blogetan! Blog izarren bila

AZKUE FUNDAZIOA
Agoitz plaza 1, 48015 Bilbo, Bizkaia
Tel. 94 402 80 81 - Faxa. 94 405 24 07