blogak

Begizta

Instagramek eta Facebookek zentsuratu dute tortura salatzeko ekimen honen argazkia

Pasa den ostiralean Sortu alderdi politikoak torturatzaileen inpunitatea salatzeko ekimena egin zuen Gasteizko erdigunean. Biluzik, eskuak lotuta eta burua poltsa beltzez estalita, hainbat lagun agertu dira Espainiako Gobernuaren ordezkaritzaren eta polizia etxe baten aurrean. Fokuko Endika Portilloren argazki hori bi orritara zabaldu dugu aldizkarian eta sarean, baina torturatuen errealitatea biluztea ez dute maite Instagram eta Facebook multinazionaletako ordezkariek, ordea.

Instagram edo Facebook-era igotako argazkietan emakumeen titi-buruak (gizonena ez), ipurdiak lehen planoan edo genitalak agertuz gero, berdin da zein den irudi horien helburua, emaitza bat eta bakarra izango da: zentsura. Matxismoa, xenofobia, sionismoa, faxismoa eta beste bidegabekeria batzuen aurrean ez dira hain zorrotzak eta munduan barrena salaketa ugari jaso dute horregatik. Baina, funtsean, arazoa ez da haiena. Edukien egokitasuna multinazional batzuen algoritmoak erabakitzen duenean –eta gure edukien gaineko botere hori haiei ematen diegunean– zerbait gaizki egiten ari garen seinale da.

ARGIAn argi dugu jendea dagoen lekuan eskainiko dugula informazioa libre eta doan. Eta, gustatu nahi ala ez, AEBetako multinazionalen menpeko sare sozialetan aritzen gara euskal herritar gehienok. Horregatik gaude plataforma horietan. Baina, horrelako gertaera zehatzek agerian uzten dute oinarrizko gabezia bat: dirua egitea beste asmorik ez duten enpresek jendearentzat zer den onargarria eta zer ez erabakitzeko gaitasuna dutenean, orduan independenteak ez garen seinale da. Areago, kasu honetan bezala, zentsuraren atzean enpresa bakarra dagoenean: Meta. Beste askoren artean, Instagram, Facebook eta Wathsapp-en jabe den enpresa. Aplikazio guztiak software jabedunak, ez libreak. Erabilera, aldaketa eta banaketa mugatuta dituzten zerbitzuak dira, haien barrenak (iturri kodea) ikustea debekatuta dutenak.

Agian zentsura da “doan” eskaintzen dizkiguten zerbitzu horien truke ordaindu behar dugun prezioa. Akaso bai. Multinazionalen “doako” zerbitzuetan, guk debalde ematen dizkiegun informazio, irudi eta bideoen truke, pertsonak garelako salgaiak. Eta salgai dagoena ez da burujabea.

The post Instagramek eta Facebookek zentsuratu dute tortura salatzeko ekimen honen argazkia appeared first on Begizta.

jatorrizkoa ikusi

2013-2024
Blogetan! Blog izarren bila

AZKUE FUNDAZIOA
Agoitz plaza 1, 48015 Bilbo, Bizkaia
Tel. 94 402 80 81 - Faxa. 94 405 24 07