blogak

Angelu itsua

Krisi ekonomikoaren hurrengo portua

Abuztuko beroan, oporraldian harrapatu ditu Europako agintari politiko ugari, kezkatzeko moduko albiste ekonomikoak: Alemania atzeraldian sartzeko zorian dago. “Saihestu dezakegu, neurri egokiak hartuz gero”, esan zuen Peter Altmier ekonomia ministro alemaniarrak Saarbruckeko udako etxetik. Baina egun batzuk geroago Bundesbankak berak jo zuen alarma. Alemaniako BPGa %0,1 jaitsi zen bigarren hiruhilekoan eta seguruenik hurrengo hiruhilekoa ere antzera joango da; beraz, teknikoki atzeraldian sartuko litzateke Europako lokomotora deitzen dena. Alemaniako geldialdia Txina eta AEBen arteko gerra komertzialak eta Brexit gogor baten beldurrak eragin du, esportazioari emanak baitaude –industria ekoizpenaren datuak ere azken hamarkadako txarrenak izan dira–.

Halako albisteak irakurtzen baditugu paisaia ekonomiko osoari begiratuz, ikusiko dugu gero eta gertuago dagoela 2007an hasitako krisi ekonomikoaren hurrengo portua: Erresuma Batuko BPGa %0,2 jaitsi da, Italiakoa zeron geratu, eskaintza gehiegizkoa da, prezioak eta inflazioa apenas igo dira, interes tasek barre gurea ematen dute… Krisiaren hurrengo enbata “ez du motibo bakar batek” sortzen, azaldu du Niño Becerra ekonomialari ospetsuak Twitterrez.

Gurean ere abuztuak ekarri dizkigu laino beltz batzuk, kasik oharkabean igaro direnak: zerga bilketa uste baino txikiagoa izan da Araban, Bizkaian eta Gipuzkoan –ez da iritsi lehendik nahikoa zuhurrak ziren aurreikuspenetara–, eta etxe salmentak behera egin du Hego Euskal Herrian, bost urteko hazkundearen ondoren.

Jens Weidmann eta Olaf Scholz Bundesbankeko presidentea eta finantza ministroa, Biarritzeko G7 gailurraren aurretik egindako billkuran (arg. Bundesbank)

 

Aspalditik ari dira analistak alokairuaren burbuilaz ohartarazten, baita finantza kasino globalaren arriskuaz eta mundu mailako zorpetze erraldoiaz ere. Baina Alemaniak ez du zor askorik, eta aukera izango luke gastu publikoaren bidez ekonomia pizteko –austeritatearen ortodoxia hautsiko al du?– eta denbora irabazteko. Arazoa zor asko pilatuta dutenek izango dute, eta Espainiako eta Frantziako estatuena –BPGaren %98 eta %99, hurrenez hurren– ez da nolanahikoa.

Albiste huts bat bestearen atzetik irakurtzea, errepideko bihurgune bat bestearen atzetik kontatzea bezala da, jabetu gabe jadanik mendia eta portua igotzen ari garela.

jatorrizkoa ikusi

2013-2020
Blogetan! Blog izarren bila

AZKUE FUNDAZIOA
Agoitz plaza 1, 48015 Bilbo, Bizkaia
Tel. 94 402 80 81 - Faxa. 94 405 24 07